Ye kahani hai har us bache ki jo us mahol mein parha hai jahan mashray ne usay bachpan se bas ek hi baat ka dars diya; beta tum toh laiq ho, tum toh doctor hi bano ge, aur us masoom bache ne is baat ko sach maan liya aur apni zindagi ka maqsad wo samajh liya jo kabhi tha hi nahi.
Kuch aisi hi kahani meri bhi thi, hamesha se yehi soch paida ki gayi ke beta doctor ban jate toh kamaal ho jata, aur isi baat ko haq mante hue hum ne bhi wohi ghalti ki jo har bacha karta hai; matric aur intermediate mein Biology as a subject choose karna. Mujhe ye baat pata chalne mein zyada waqt na laga ke main Biology ke liye bana hi nahi tha. Aur is ghalti ko sudharne ke liye main ne ek aur ghalti kar di; BS ke liye Bioinformatics choose karna. Yahan aakar mere samne dono duniyaon; Biology aur Computer Science ki haqeeqat khuli. Baaz khatain nagazeer hoti hain aur wo aap ko zindagi ka rasta dikhane ka kaam karti hain.
Bioinformatics mein aana ghalti zaroor thi, aur main ne survive karne ki koshish ki, isi dauran Bio-Agent jesa tool bhi banaya, magar na main Biology ke liye bana tha aur na Biology mere liye. Aur isi ghalti ne mujhe asal rasta dikhaya jise aam zuban mein interest kaha jata hai aur humare nizam-e-taleem ka almiya hai ke kisi ko bhi ye baat maloom nahi hoti ke uska interest darasal hai kya.
Khair jaise hi mujhe is baat ka andaza hua ke main Computer Science ke liye bana tha aur yehi wo cheez hai jis ke bare mein, main ghanto soch sakta hu; toh main ne sab se pehle apne laptop par installed Fedora Linux ki taraf dekha aur bola; let's learn bash. Main ne bash seekhna shuru ki aur seekhta gaya, roz apne workflow mein bash commands istemaal karna shuru ki.
Phir aata hai wo daur jab main Fedora use kiya karta tha aur main ne ye sun rakha tha ke Linux par aap koi bhi cheez apni marzi se customize kar sakte hain. Main ne boht koshish ki ke kisi tarah Fedora mein, main frosted glass, ya glassmorphism jesa effect add karu, just to find out ke ye cheez mumkin nahi, aur agar kisi tarah mumkin bhi ho to kai aisi cheezein hain jin main mujhe compromise karna hi pare ga. Main ne ye socha ke main ek mamooli change ke liye updates ka wait nahi kar sakta, mujhe apna laptop bilkul apne mizaj par chahiye tha.
Yehi wo waqt tha jab main ne Hyprland ke bare mein parhna shuru kiya, aur ye socha ke apna working environment set karte hain. Khair main ne usi waqt Hyprland install kiya aur usi ki configuration ko edit karta gaya aur apni marzi se set karta gaya. Main roz thora thora kar ke edit karta raha aur shuru mein un cheezon ko comment out kar diya jin ki zaroorat nahi thi.
Isi dauran Emo robot jaise bipedal robot se inspire hokar ye decide kiya ke apna khud ka ek robot kyun na banayein aur usay Kuku ka naam dein. Hardware na hone ke bawajood main ne kuch cheezein program kar lin. Hardware ke liye paise jama karte hue aur programming karte hue is baat ka ahsas hua ke RAM consumption arooj par ja rahi hai. Jab wajah trace ki toh ahsas hua mera laptop boht se aise kaam kar raha hai jin ke bare mein mujhe andaza hi nahi. Is ki ek bari wajah main ne systemd ko samjha aur usi raat Artix par shift ho gaya. Khud ki dotfiles wahan clone ki, just to find out ke Artix ki rolling ki wajah se syntax badal gaya aur saari config toot gayi.
Khair main ne poori raat laga kar configuration ka syntax change kiya aur Artix ke liye dots ko configure kiya. Isi doran main ne low-level processes ke bare mein parhna shuru kiya aur understanding ke liye C++ mein apna shell likha, jis ne mujhe low-level programming ke mazeed qareeb kar diya. Aur phir aata hai current dor jab ke main Rust jesi zuban seekh raha hu aur isi mein apna shell rewrite kar raha hu.
Ye path har kuch arse baad change ho jaye ga kyun ke jis raste ka main musafir hu kal ko wo kahan mur jaye kisi ko maloom nahi. Ye tehreer likhne ka maqsad ye nahi ke main ne manzil paa li, balke is ka maqsad ye hai ke main ne us raste ka safar shuru kiya jo mere liye bana hay.
Is safar par jitne bhi log jure main ne un sab se seekha, sab ka dili shukriya. Khaas tor par mere waldein ka; jinhon ne har mor par mera sath diya aur abhi bhi de rahe hain. Aur Kuku (my first pet cat, lost to a virus) ko kaise bhool sakte hain jis ne mere sochne ka zaviya mukammal badal diya.
Rozana ka safar dekhne ke liye: Timeline